चितवनको शक्तिखोरमा नेमकिपाको ५१ औं स्थापना दिवसको अवसरमा प्रशिक्षण

नेपाल मजदुर किसान पार्टी चितवन जिल्ला समितिको आयोजनामा नेमकिपाको ५१ औं स्थापना दिवसको अवसर पारेर शक्तिखोरमा आज कार्यकर्ता भेला तथा प्रशिक्षण कार्यक्रम सम्पन्न भयो ।

कार्यक्रमका प्रमुख अतिथि नेपाल मजदुर किसान पार्टीका केन्द्रीय सदस्य सुनिल प्रजापतिले पार्टीको ५१ औं स्थापना दिवसको अवसरमा शुभकामना दिँदै नेमकिपाले निर्वाचनलाई वर्ग संघर्ष गर्ने थलोको रुपमा उपयोग गर्दै आएको बताउनुभयो ।

उहाँले नेपाल मजदुर किसान पार्टी जनताको प्रजातन्त्र, समाजवाद हुँदै साम्यवादी व्यवस्था स्थापना गर्ने दीर्घकालीन उद्देश्यका साथ अगाडि बढिरहेको बताउँदै नेकपा एमाले र माओवादीले कम्युनिष्टको नाउँमा जनतालाई धोका दिइरहेको बताउनु भयो । उहाँले संविधान समयको आवश्यकताअनुसार देश र जनताको हितमा हुनु पर्नेमा जोड दिनुहुँदै उत्पादनका साधनहरु सामाजिकीकरण, शिक्षा र स्वास्थ्य उपचार निःशुल्क, व्यक्तित्व विकासमा समान अवसर र योग्यता अनुसार काम र कामअनुसार ज्यालाको वन्दोवस्त लगायत जनताको हितमा संविधान संशोधन आवश्यक रहेको बताउनु भयो ।

उहाँले निजीकरणको पक्ष लिनेहरु कम्युनिष्ट हुन नसक्ने बताउँदै उत्पादनका मुख्य मुख्य साधनहरु सामाजिकीकरणको पक्ष लिनेहरु समाजवादी हुने स्पष्ट पार्नु भयो । पुँजीवादी व्यवस्थामा सम्पत्ती सीमित व्यक्तिमा केन्द्रित हुँदै जाने र राज्य कमजोर हुँदै जाने छ– उहाँले बताउनुभयो ।

संसदमा जनविरोधी विधेयकहरुको विरोध गर्ने, देशघाती सन्धि सम्झौताहरुको पारित गर्न नदिने र जनतालाई सचेत पार्ने तथा साम्राज्यवादी देशहरुले कमजोर देशहरुमाथि गरिरहेको हमला, थिचोमिचो र हस्तक्षेपको विरोध गर्दै नेमकिपाले अन्तर्राष्ट्रिय कर्तव्य पनि पूरा गर्दै आएको उहाँले बताउनुभयो ।

उहाँले एक जना कम्यनिष्ट भएसम्म समाजवादको झण्डा उच्च पार्नु पर्नेमा जोड दिनु भयो ।

कार्यक्रमका सभापति नेमकिपा चितवन जिल्ला समितिका अध्यक्ष हरिप्रसाद दुवालले पार्टी स्थापनाकालदेखि पार्टीले कामदार वर्गलाई राजनैतिक रुपमा संगठित पार्ने अभियानमा निरन्तर लागिरहेको बताउनुभयो ।

नेपाल क्रान्तिकारी महिला संघका केन्द्रीय सदस्य रोशनमैंया सुवालले कम्युनिष्ट पार्टीको नाममा शासकहरुले जनतालाई ठग्ने र भ्रममा पार्ने काम गर्दै आएकोले जनताले दुःख भोग्दै आएको बताउनुभयो ।

नेपालको सच्चा कम्युनिष्ट पार्टी नेमकिपा हो भन्दै उहाँले नेमकिपाले जनतालाई सैद्धान्तिक शिक्षा र चेतना दिएर आफ्ना कार्यकर्तालाई परिपक्व बनाउँदै आएको बताउनुभयो ।

नेक्रायुसंघका केन्द्रीय सदस्य जगतराम धुख्वाले युवाहरुलाई स्वदेशमै रोजगारी सुनिश्चितताको लागि नेमकिपाले पहल गर्दैै आएको बताउँदै समाजवादी व्यवस्था स्थापनाले पनि गरिब जनताले पनि समान अवसर पाउने बताउनुभयो ।

भक्तपुर नगरपालिका वडा नं. १ का वडाध्यक्ष श्यामकृष्ण खत्रीले भक्तपुर नपाले गरिरहेको युवालक्षित गतिविधिबारे प्रष्ट पार्दै भक्तपुर नपाको आयोजनामा चैत्र २३ देखि २६ गतेसम्म अन्तरनगर जिम्नाष्टिक प्रतियोगिना आयोजना गर्ने तयारी गरिरहेको बताउनुभयो ।

नेक्रामसंघ चितवन जिल्ला समितिका अध्यक्ष सुमित्रा महत्तोले पार्टी कार्यकर्ताले पार्टी प्रतिबन्धको अवस्थामा आफ्नो परिवारले र पार्टीलाई जोगाउन गरेको संघर्षबारे प्रष्ट पार्दै पार्टी कार्यकर्ताले पार्टी प्रकाशन अध्ययनमा जोड दिनुपर्ने बताउनुभयो ।

नेमकिपा चितवन जिल्लाका मोहन प्रजाले अक्टोबर क्रान्ति र यसको महत्व पुस्तकबारे आफ्नो अध्ययनको सार प्रस्तुत गर्नुभयो ।

कार्यक्रममा नेक्राविसंघ चितवनका अध्यक्ष अर्जुन चेपाङले नयाँ पुस्तालाई पार्टीको इतिहास, आन्दोलन, सिद्धान्तबारे प्रष्ट पार्नुपर्ने बताउँदै नेमकिपाका कार्यकर्ताहरुले अनुशासित र इमानदारीपूर्वक जनताको सेवा गर्दै आएको बताउनुभयो ।

उक्त कार्यक्रममा नेमकिपा चितवनका जिल्ला सचिव ज्ञानेन्द्र चेपाङ र उपाध्यक्ष विष्णु शर्माले पनि पार्टी स्थापनाको सैद्धान्तिक उद्देश्यबारे आफ्नो धारणा राख्नुभयो ।