महिला स्वास्थ्य स्वयम्सेविकाहरुको वार्षिक भेटघाट कार्यक्रम सम्पन्न

भक्तपुर नगरपालिकाका १० वटै वडामा कार्यरत महिला स्वास्थ्य स्वयम्सेविकाहरुको वार्षिक भेटघाट कार्यक्रम सोमबार सम्पन्न भयो ।

कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले भक्तपुरले स्वास्थ्य र सामाजिक क्षेत्रमा गरिरहेका नवीनत्तम अभ्यासमा महिला स्वास्थ्य स्वयम्सेविकाहरु उल्लेखनीय भूमिका रहेको बताउनुभयो ।

निःस्वार्थ रुपमा जनताको सेवा गर्नु नै असल राजनीतिको परिचय भएको बताउँदै उहाँले भक्तपुरको पृथक र असल अभ्यासबाट अन्य स्थानीय तहहरुले पनि सिको गर्न खोजिरहेको छ भन्नुभयो ।

भक्तपुर नपाको आयोजनामा भएको पाँचदिने भक्तपुर महोत्सव स्वयम्सेवकहरुको निःस्वार्थ भावनाले सफल भएको बताउँदै नागरिकहरुले आफ्नो सामाजिक दायित्व बहन तर्फ पनि जोड दिनुपर्ने धारणा राख्नुभयो ।

महिला स्वास्थ्य स्वयम्सेविकाहरु सामाजिक, आर्थिक, शैक्षिक रुपले शिक्षित र संगठित हुन जरुरी रहेको बताउँदै स्वास्थ्य स्वयम्सेविकाहरु सामाजिक कार्यकर्ता हुन् भन्नुभयो ।

भनपा वडा नं. ३ का कार्यबाहक वडाध्यक्ष कृष्णगोपाल चौगुठीले वडाले निर्धारित गरेका सामाजिक कार्यक्रमहरुमा महिला स्वास्थ्य स्वयम्सेविकाहरुकोतर्फबाट सकारात्मक साथ र सहयोग रहँदै आएको बताउँदै निःस्वार्थ रुपमा जनताको सेवा गर्नु स्वयम्सेविकाहरुको कर्तव्य भएको बताउनुभयो ।

कार्यपालिका सदस्य सुनिता अवालले वडामा हुने गतिविधिहरुमा वडाबासीहरुको सहभागिता बढाउन महिला स्वयम्सेविकहरुको महत्वपूर्ण भूमिका रहँदै आएको बताउँदै वडाबासीहरुको सहयोगीको रुपमा स्वयम्सेविकाहरु परिचालन हुनु जरुरी रहेको बताउनुभयो ।

ख्वप अस्पतालका निमित्त मेडिकल डाइरेक्टर डा. मजेशप्रताप मल्लले स्वास्थ्य स्वयम्सेविकाको सहयोगमा ख्वप अस्पतालले स्वास्थ्य क्षेत्रमा धेरै गतिविधिहरु गर्न सफल भएको बताउँदै आगामी दिनहरुमा पनि उहाँहरुको सक्रियता रहँदै जाने विश्वास व्यक्त गर्नुभयो ।

उक्त कार्यक्रम महिला स्वास्थ्य स्वयम्सेविकाका अध्यक्ष बबीमैंया लघुको सभापतित्वमा सम्पन्न भएको थियो ।