३३ औं अन्तर्राष्ट्रिय अपांगता दिवसको अवसरमा भक्तपुर नगरपालिकाको आयोजनामा ‘समावेशी तथा दिगो भविष्यको आधार, अपांगता भएका व्यक्तिहरुको प्रबल नेतृत्व यसको आधार’ भन्ने नाराका साथ अपांगता दिवस कार्यक्रम मंगलबार सम्पन्न भयो ।
कार्यक्रममा भक्तपुर नगरपालिकाका प्रमुख सुनिल प्रजापतिले नगरभित्रका अपांगता भएकाहरुलाई थर्मस वितरण गर्नुभयो ।
कार्यक्रममा बोल्दै प्रमुख प्रजापतिले बालबालिकामा हुने अपांगताको पहिचान जति छिटो भयो उति नै उपचार सहज हुने बताउँदै उहाँले अपांगता भएकाहरुको लागि भक्तपुर नपाले विविध गतिविधि सञ्चालन गर्दै आएको बताउनुभयो ।
अपांगता भए पछि व्यक्तिले त दुःख पाउँछ नै, साथै परिवार र समाजबाट पनि अपहेलित हुने बताउँदै उहाँले अपांगता भएका व्यक्तिहरुको सम्मानयोग्य जीवनयापन गर्ने अधिकार सुनिश्चितताको लागि भक्तपुर नपाले काम गर्दै आएको बताउनुभयो ।
अपांगतासम्बन्धी व्यवस्थित कानुन निर्माण र त्यसको कार्यान्वयनबाट अपांगता भएकाहरुलाई जीवनयापनमा सहजता पुग्ने बताउँदै उहाँले रोजगारी, विभिन्न सीपमूलक तालिम सञ्चालनबाट अपांगता भएकाहरुलाई सबल बनाउन सकिने धारणा राख्नुभयो ।
त्यस्तै भक्तपुर नगरपालिका अपांगता समितिका अध्यक्ष एवम् उपप्रमुख रजनी जोशीले सन् १९९२ देखि विश्वभर अपांगता दिवस मनाउन थालिएको बताउँदै उहाँले अपांगता भएका व्यक्तिहरुको हक अधिकार सुनिश्चितता, जनमानसमा चेतना फैलाउन र उनीहरुको पहिचान, आत्मसम्मान र स्वाभिमानलाई उँचो पार्न विश्वभर अपांगता दिवस मनाउन थालिएको बताउनुभयो ।
भक्तपुर नपाले अपांगता भएका व्यक्तिहरुको बृहत भेला, स्वास्थ्य शिविर तथा अतिरिक्त क्रियाकलापहरु सञ्चालन गरी पुरस्कृत गर्दै आएको बताउँदै उहाँले अपांगता भएका व्यक्ति र अभिभावकहरुलाई निःशुल्क स्वास्थ्य शिविर पनि सञ्चालन गर्दै आएको बताउनुभयो ।
भक्तपुर नपाका प्रमुख प्रशासकीय अधिकृत वसन्त भट्टराईले अपांगता भएका व्यक्तिहरुलाई व्यक्तित्व विकासमा समान अवसर दिनुपर्ने बताउँदै अपांगतासम्बन्धी ऐन कानुन निर्माण र त्यसको प्रभावकारी कार्यान्वयनतर्फ जोड दिनुपर्ने बताउनुभयो ।
अपांगतासम्बन्धी अस्थायी समन्वय समितिका सदस्य हिमालयश्वरलाल मुलले अपांगताका कारणहरुबारे प्रष्ट पार्दै अपांगता भएकाहरुको मनोबल बलियो बनाउने काम परिवार समाजबाट हुन जरुरी रहेको बताउनुभयो ।
कार्यक्रममा अपांगता समितिका सदस्य श्यामकृष्ण खत्री र कार्यपालिका सदस्य रोशनमैंया सुवालले पनि बोल्नुभयो । अपांगता दिवसको अवसरमै ख्वप अस्पतालको प्राविधिक सहयोगमा अपांगता भएका व्यक्ति र परिवारहरुको लागि स्वास्थ्य शिविर पनि गरिएको थियो । सोही क्रममा भक्तपुर नपाद्वारा ख्वप अस्पताललाई फिजियोथेरापी मेसिन हस्तान्तरण गरिएको थियो ।
