नयाँ पुस्तालाई देश र जनताको सेवामा काम गर्न सधैँ उत्प्रेरित गरिरहनुपर्ने

 नेपाल मजदुर किसान पार्टीका केन्द्रीय सदस्य एवं भक्तपुर नगरपालिकाका प्रमुख सुनिल प्रजापतिले क्रान्तिकारी साहित्य प्रतिक्रियावादीहरूका लागि अणु बमभन्दा पनि खतरनाक हुने भएकोले जनस्तरबाट त्यस्ता साहित्यकारहरू तयार गर्न साहित्य सम्मेलनको आयोजना गर्दै आएको बताउनुभयो ।

२६ औँ विविध भाषा साहित्य सम्मेलनको समीक्षा कार्यक्रममा बोल्दै उहाँले नयाँ पुस्तालाई देश र जनताको सेवामा काम गर्न सधँै उत्प्रेरित गरिरहनुपर्ने बताउँदै अहिले युवाहरू विदेश जाने लहरले देश युवाविहीन हुने खतरा बढिरहेको छ भन्नुभयो ।

“हामीले समाजवादी देशहरूबाट सिक्नुपर्छ । त्यहाँ कसरी पार्टी कार्यकर्ताहरू देश र जनताको निम्ति निरन्तर स्वयंसेवी भावनाले काम गर्छन् ? हामीले पनि देश र जनतालाई केन्द्रबिन्दुमा राखेर काम गर्नुपर्छ ।” उहाँले भन्नुभयो ।

हरेक पार्टी कार्यकर्ताले पार्टी प्रकाशन नियमित अध्ययन गर्ने र त्यसबारे अन्तरक्रिया, छलफल र विचार गोष्ठीहरू गरेर वैचारिक स्तर उठाउने काम गर्न जरुरी रहेको बताउँदै उहाँले अनुशासित कार्यकर्ताहरूले मात्रै पार्टीको लक्ष्य पूरा गर्न सक्छन् भन्नुभयो ।

पार्टीले दिएको जिम्मेवारी पूरा नगर्ने कार्यकर्ताहरू जतिसुकै उच्च शिक्षा अध्ययन गरेको भए पनि राम्रो कार्यकर्ता हुन नसक्ने बताउँदैै उहाँले भन्नुभयो, “व्यक्तिगत स्वार्थका निम्ति काम गर्नेहरूले पार्टीको उद्देश्यअनुसार समाजको हितमा काम गर्न चाहँदैनन् । राम्रा र नराम्रा कार्यकर्ताहरू चिन्ने भनेकै उनको कामले हो, चर्का चर्का भाषणले होइन ।”

नेपाल मजदुर किसान पार्टी मध्यपुर नगर समितिका अध्यक्ष रमेश वैद्यले समाज सुधारको उद्देश्यले निरन्तर साहित्य सम्मेलन गर्दै आएको बताउँदै विविध भाषा साहित्य सम्मेलनमा साथ र सहयोग गर्ने सबैलाई धन्यवाद दिनुभयो ।

कार्यक्रममा विविध भाषा साहित्य समाज मूल समितिका अध्यक्ष प्रेम के. निडर, समाजका सल्लाहकार सूर्यराम थाश्रेष्ठ, ग्वसाखलका अध्यक्ष दिलबहादुर बाटा, अम्बर श्रेष्ठलगायतले सम्मेलनमा भएका सबल र दुर्बल पक्षबारे समीक्षात्मक टिप्पणी गर्दै सम्मेलन सबैको सहयोगमा सफल भएकोमा खुसी व्यक्त गर्नुभयो ।