नगर प्रमुख प्रजापतिसँग गोरखाको भिमसेनथापा गाउँपालिका अध्यक्ष लोकप्रसाद बन्जाराको भेट

भक्तपुर नगरपालिकाका प्रमुख सुनिल प्रजापतिसँग गोरखाको भिमसेनथापा गाउँपालिकाका अध्यक्ष लोकप्रसाद बन्जाराले बुधबार भेट गर्नुभयो ।

भेटमा उहाँहरुबीच दुई स्थानीय तहबीचको सिकाइ अनुभव आदानप्रदान, भौगोलिक अवस्था र देशको समसामयिक तथा राजनीतिक विषयमा कुराकानी भयो ।

प्रमुख प्रजापतिले गाउँपालिका अध्यक्ष बन्जारालाई भक्तपुर नपामा खादा र भादगाउँले टोपीले स्वागत गर्नुहुँदै भक्तपुरको शैक्षिक विशेषताबारे प्रष्ट पार्नुभयो । भक्तपुर नपाबाट सञ्चालित शैक्षिक संस्थाहरूमा देशभरिबाट ७ हजारभन्दा बढी विद्यार्थीहरुले अध्ययन गरिरहेको र स्वास्थ्य सेवामा पनि सहज व्यवस्था गरिरहेको बताउँदै उहाँले ती कलेजहरुले विद्यार्थीहरुलाई छात्रवृत्ति र शैक्षिक ऋण समेत प्रदान गरी उच्च शिक्षा हासिल गर्ने अवसर प्रदान गर्दै आएको बताउनुभयो ।

शासक दलहरूप्रति जनताको विश्वास घट्दै गइरहेको सन्दर्भ जोड्दै उहाँले माओवादी सरकारको नेतृत्व रहेको बेला जनताको हितमा माओ विचारधाराअनुसार काम गरेको भए पार्टी र देशकै निम्ति फाइदा हुने थियो भन्नुभयो । उहाँले ‘राजनीतिमा हेलचेक्र्याइँ गर्नु भनेको हिमालमा चिप्लेटी खेल्नुजस्तै खतरनाक हुन्छ’ भन्नुभयो ।

भक्तपुरले शिक्षा, स्वास्थ्य, सम्पदा पुनःनिर्माण, सरसफाइलगायतका कामहरु जनसहभागितामा गरिरहेको असल अभ्यासबारे अवगत गराउनुहुँदै उहाँले हरेक ठाउँको विकासमा स्थानीय जनसहभागिता महत्वपूर्ण विषय भएको बताउनुभयो ।

भिमसेनथापा गा.पा. अध्यक्ष लोकप्रसाद बन्जाराले ८ वटा वडामा विभाजित गण्डकी प्रदेशअन्तर्गत गोरखाको भिमसेनथापा गाउँपालिकाको ५० प्रतिशत भूगोल जंगलले घेरिएको बताउँदै भौगोलिक विविधता र प्राकृतिक सम्पदाले भरिएको यस गाउँपालिकाको क्षेत्रफल १०१.३५ वर्ग कि.मि. रहेको बताउनुभयो । उहाँले एक वडा एक उत्पादन, एक संकलन केन्द्र र एक पोषण केन्द्र बनाउने घोषणा गरे पनि सफल नभएको बताउनुभयो ।

भक्तपुरले गरेका उदाहरणीय कामबाट आफूहरुले पनि सिक्न चाहेको बताउँदै उहाँले नागरिकहरुमा स्वयम्सेवी भावना हराउँदै जाँदा आफ्नो क्षेत्रको विकासमा बाधा पुगेको स्मरण गर्नुभयो ।

सोही क्रममा नगर प्रमुख प्रजापतिले गा.पा. अध्यक्ष बन्जारालाई नपाका प्रकाशनहरु उपहारस्वरुप प्रदान गर्नुभयो ।