विश्व आत्महत्या रोकथाम दिवसको अवसरमा अन्तरक्रिया कार्यक्रम सम्पन्न

भक्तपुर नगरपालिकाका उपप्रमुख रजनी जोशीले आत्महत्या रोकथाम विश्वमा नै चुनौतीको रुपमा रहेको बताउँदै आत्महत्या रोकथामका उपायहरुबारे समुदायमा विविध गतिविधिहरु सञ्चालन गर्नुपर्नेमा जोड दिनुभयो ।

भक्तपुर नगरपालिकाको आयोजनामा स्वास्थ्य स्वयम्सेविकाहरुको सहभागितामा विश्व आत्महत्या रोकथाम दिवसको अवसरमा आयोजित कार्यक्रममा बोल्दै उहाँले आत्महत्या रोकथाममा स्वास्थ्य स्वयम्सेविकाहरुको भूमिका महत्वपूर्ण हुने बताउँदै उहाँले मानसिक र शारीरिक स्वस्थको लागि नियमित खानपान र स्वस्थ जीवनशैली अपनाउनुपर्ने बताउनुभयो ।

सामाजिक विकृति न्युनीकरणले पनि आत्महत्याका घटनाहरुमा कमी आउने बताउँदै उहाँले आत्महत्या रोकथामका लागि सामुदायिक क्रियाकलापमा सहभागिता बढाउनुपर्ने बताउनुभयो ।

रोग लाग्न नदिने उपायहरु अपनाउनुपर्ने बताउँदै उहाँले नियमित स्वास्थ्य जाँच गर्न सके समभावित रोगहरुबाट बच्न सकिन्छ भन्नुभयो ।

कार्यक्रममा ख्वप अस्पताल निमित्त मेडिकल डाइरेक्टर डा. मजेश प्रताप मल्लले आत्महत्या गम्भीर र संवेदनशील समस्या भएको हँदा आत्महत्याको कारण समयमै पहिचान गरी आवश्यक परामर्श लिनु आवश्यक भएको बताउनुभयो ।

भक्तपुर नपाका स्वास्थ्य संयोजक डा. रत्नसुन्दर लासिवाले स्वास्थ्य स्वयम्सेविकाहरु समाजसँग नजिक बसेर काम गर्ने सामाजिक कार्यकर्ता भएको हुँदा आत्महत्याबारे जनचेतना जगाउन स्वास्थ्य स्वयम्सेविकाहरुले महत्वपूर्ण भूमिका खेल्नुपर्ने बताउनुभयो ।

हे.अ. कमलकेशरी राजचलले आत्महत्याको कारण र रोकथामका उपायबारे प्रस्तुतीकरण देखाउँदै आत्महत्या रोकथाममा समुदायको भूमिका अति आवश्यक भएको बताउनुभयो ।