नगर प्रमुख प्रजापतिसँग ख्वप्रिङ इंगलिश एकेडेमी स्कूलका विद्यार्थीहरुको सक्षात्कार

भक्तपुर नगरपालिकाका प्रमुख सुनिल प्रजापतिसँग भक्तपुर नपा वडा नं. ८ लिबालीस्थित ख्वप्रिङ इंगलिश एकेडेमी स्कूल कक्षा ९ र १० का विद्यार्थीहरुले बुधबार नगरपालिकाको सभाकक्षमा साक्षात्कार गरेका छन् ।

विद्यालयका शिक्षक—शिक्षिका सहित करिब १०० जनाको टोलीले नगर प्रमुख प्रजापतिसँग भेटी नगरपालिकाले विशेषगरी शिक्षा क्षेत्रमा गरिरहेको असल र उदाहरणीय कार्यबारे आवश्यक जानकारी प्राप्त ग¥यो ।

टोलीलाई भक्तपुर नपामा स्वागत गर्दै नगर प्रमुख प्रजापतिले भक्तपुर नगरपालिकाले नेपालको संविधानले प्रदान गरेको २२ वटा एकल अधिकारको विषयमा कानुन निर्माण गरी काम गर्दै आइरहेको र स्थानीय सरकार सञ्चालनले दिएको अधिकार भित्र रही शिक्षा, स्वास्थ्य उपचार, सम्पदा संरक्षण, सरसफाइलगायतका क्षेत्रको विकासमा जोड दिँदै आएको बताउनुभयो ।

स्थानीय तह जनताको नजिकको सरकार भएको बताउँदै उहाँले स्थानीय तह सक्षम र बलियो भए व्यापक जनताको हितमा काम गर्न सहज हुने बताउनुभयो ।

भक्तपुरको कला, संस्कृति र सम्पदा आदिबारे विद्यार्थीलाई अपनत्व जगाउन भक्तपुर नपाले सबै विद्यार्थीहरुलाई स्थानीय पाठ्यक्रम निर्माण गरी अध्ययन अध्यापनमा समेत जोड दिँदै आएको बताउनुभयो ।

उहाँले अध्ययनशील र मेहेनती विद्यार्थीको समाजमा छुट्टै पहिचान हुने बताउँदै विद्यार्थीहरुले आफ्नो मौलिकता प्रदर्शन गर्ने ढंगले आफ्नो व्यक्तित्व विकासमा जोड दिनुपर्छ भन्नुभयो ।

विदेशीको भरमा विकास गर्ने सोचले देशको स्वाभिमानमा आँच आउने खतरा निम्तिन्छ भन्दै उहाँले सम्पदा संरक्षण सबैको साझा कर्तव्य भएको बताउनुभयो ।

विद्यार्थीहरुको जिज्ञासाबारे प्रष्ट पार्दै उहाँले नगर प्रहरी व्यवस्थापनसँगै नगरको शान्ति सुरक्षा, पार्किङ, बजार व्यवस्थापनमा सुधार आएको, राजनीति देश र समाजको निःस्वार्थ सेवा हो भन्नुभयो ।

साक्षात्कार कार्यक्रममा उपस्थित विद्यार्थीहरुले भक्तपुरको शिक्षा प्रणाली, शैक्षिक क्रान्तिको अवस्था, नेपाल भाषा संरक्षण, नगर प्रहरी व्यवस्थापन, कर संकलन प्रक्रिया आदिबारे जिज्ञासा व्यक्त गर्नुभएको थियो ।