क्वाकचा गणेश मन्दिरको उद्घाटन

 भनपा वडा नं. ७ गोल्मढीस्थित क्वाकचा गणेश मन्दिरको शनिबार एक कार्यक्रमबिच उद्घाटन भयो ।

मन्दिर उद्घाटन गर्दै भक्तपुर नपाका प्रमुख सुनिल प्रजापतिले भक्तपुर सांस्कृतिक सम्पदाले भरिएको ऐतिहासिक नगर भएको बताउँदै यहाँका मूर्त, अमूर्त सम्पदा संरक्षणलाई नपाले विशेष जोड दिँदै आएको बताउनुभयो ।

विकास निर्माण कार्य पारदर्शी ढङ्गले उपभोक्ता समितिमार्फत सम्पन्न गर्नु भक्तपुरको विशेषता भएको बताउँदै उहाँले सरकारी र पर्ती जग्गा संरक्षण गर्नु नपाको प्रमुख दायित्व भएको बताउनुभयो ।

नेवाः संस्कृति नयाँ पुस्तालाई जानकारी दिने उद्देश्यले विद्यालय तहमा स्थानीय पाठ्यक्रम अध्ययन अध्यापन गराउँदै आएको बताउँदै उहाँले नयाँ पुस्तालाई सम्पदाको महत्वबारे बुझाउन सकिए यस्ता संस्कृति जीवन्त रहिरहने बताउनुभयो ।

भनपाले प्रत्येक वर्ष सांस्कृतिक प्रतियोगिता, सांस्कृतिक गुरु सम्मान आदि आयोजना गर्दै संस्कृतिकर्मीलाई उत्साहित गर्दै आएको बताउनुभयो ।

भक्तपुर नपा वडा नं. ७ का वडाध्यक्ष उकेश कवांले क्वाकचा गणेश मन्दिर पुनःनिर्माणमा स्थानीय जनताबाट आर्थिक तथा भौतिक सहयोग प्राप्त भएको बताउँदै जनताको साथ, सहयोगबिना कुनै पनि काम सम्पन्न गर्न सहज नहुने बताउनुभयो ।

मानव समाजको विकाससँगै धर्म, संस्कृतिको विकास भएको हो भन्दै उहाँले २१ औँ शताब्दीको युगमा अन्धविश्वासबाट टाढा रही विज्ञानसम्मत ढङ्गले काम गर्नुपर्छ भन्नुभयो ।

कार्यक्रममा क्वाकचा गणेश मन्दिर पुनःनिर्माण उपभोक्ता समितिका अध्यक्ष रमेश प्रधानले समितिको कार्य विवरण प्रस्तुत गर्दै सामाजिक कार्यमा स्थानीय जनताको क्रियाशील भूमिका आवश्यक भएको बताउनुभयो ।

भनपा वडा नं. ७ का वडा सदस्य एवम् अनुगमन समितिका हरिरत्न गोर्खालीले लागत इस्टिमेटभन्दा कम लागतमा मन्दिर पुनःनिर्माण कार्य सम्पन्न भएको बताउँदै भनपाका सबै गतिविधि पारदर्शी ढङ्गले सम्पन्न हुँदै आएको बताउनुभयो ।

उक्त कार्यक्रममा उपभोक्ता समितिका सदस्य दशवीर मानन्धरले मन्दिर पुनःनिर्माणको आयव्यय प्रस्तुत गर्दै क्वाकचा गणेश मन्दिर रु. ३ लाख ७८ हजार ५८८ मा निर्माण सम्पन्न भएको बताउनुभयो ।

भनपा सम्पदा उपशाखा प्रमुख रामगोविन्द श्रेष्ठ र उपभोक्ता समितिका सचिव प्रकाश तजलेले पनि बोल्नुभएको थियो ।