६ महिने आधारभूत सिलाई, बुटिक र हेयर कटिङ तालिम समापन तथा प्रमाणपत्र वितरण

भक्तपुर नगरपालिकाको आयोजनामा सञ्चालित ६ महिने आधारभूत सिलाई, बुटिक र हेयर कटिङ तालिमको शुक्रकार एक कार्यक्रमबीच समापन तथा प्रमाण पत्र वितरण सम्पन्न भयो । बुटिकका २८ जना, हेयर कटिङका २२ जना र आधारभूत सिलाइका ५२ जना गरी जम्मा १०२ जना प्रशिक्षार्थीहरुले तालिम प्राप्त गरेका थिए ।

समापन कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले सिलाई कटाइ, हेयर कटिङमा दक्ष एवम् स्वरोजगार जनशक्ति तयार गर्ने उद्देश्यले भक्तपुर नपाले हरेक वर्ष सीपमूलक तालिमलाई निरन्तरता दिँदै आएको बताउनुभयो ।

तालिमबाट प्राप्त ज्ञान र सीप कुनै पनि व्यक्तिको अमूल्य सम्पत्ति भएको बताउँदै उहाँले सिलाइ र हेयर कटिङ तालिम सञ्चालनबाट व्यापक महिलाहरु लाभान्वित भएको बताउनुभयो ।

श्रमको सम्मान गर्नुपर्ने र श्रम गर्नेहरुको समाजमा इज्जत रहने बताउँदै उहाँले सीपयुक्त व्यक्तिलाई समाजमा स्वाभिमानीपूर्वक जीवनयापन गर्न सहज हुने बताउनुभयो ।

भक्तपुर नपाले विभिन्न तालिम सञ्चालन गरी महिलाहरुलाई आत्मनिर्भर भएर बाँच्न सक्ने आधार तयार गरिरहेको बताउँदै प्रमुख प्रजापतिले महिलाहरुका लागि सानोतिनो रोजगारीले पनि राम्रो आम्दानी गर्न सकिने भएकोले यस्ता तालिमहरुलाई निरन्तर सञ्चालन गर्दै जानेतर्फ जोड दिनुभयो ।

कार्यक्रममा कार्यपालिका सदस्य रोशनमैंया सुवालले तालिमलाई अब व्यवहारमा उतारेर आत्मनिर्भरताो बाटोतर्फ लाग्न प्रेरित गर्नुभयो । महिलाहरु आर्थिक, सामाजिक र राजनीतिक रुपमा सबल भए परिवार र समाज पनि स्वतः अगाडि बढ्ने धारणा राख्दै उहाँले उद्यमीहरुले आफ्ना व्यवसायहरु नगरपालिकामा दर्ता गरी सञ्चालन गर्नुपर्ने बताउनुभयो ।

कार्यक्रममा भनपा वडा नं. १० का वडाध्यक्ष लक्ष्मीप्रसाद ह्यौंमिखाले धन्यवादज्ञापन गर्नुभएको थियो भने कार्यपालिका सदस्य छोरीमैंया सुजखू, वडा नं. ८ का वडा सदस्य सुमित्रा बोहजू र प्रशिक्षकको तर्फबाट बद्रीलक्ष्मी कवांले पनि बोल्नुभएको थियो ।

कार्यक्रममा ६ महिने तालिमका प्रशिक्षक र सहभागी प्रशिक्षार्थीहरुलाई नगर प्रमुख प्रजापतिद्वारा प्रमाणपत्र समेत वितरण भएको थियो भने तालिमका उत्कृष्ट प्रशिक्षार्थीहरुलाई पुरस्कार वितरण समेत भएको थियो ।