भक्तपुर नगरपालिकामा सहभागितामूलक ग्रामीण लेखाजोखा कार्यक्रम सम्पन्न

भक्तपुर नगरपालिकामा लघु उद्यमी बन्न चाहने र आर्थिक रुपमा विपन्न नागरिकहरुका लागि सोमबार सहभागितामूलक ग्रामीण लेखाजोखा कार्यक्रम सञ्चालन भएको छ ।

भक्तपुर नगरपालिकाको आयोजनामा भएको गरिबी निवारणका लागि लघु उद्यम विकास कार्यक्रम २०८०।८१ अन्तर्गत सहभागितामूलक ग्रामीण लेखाजोखा कार्यक्रम (पी.आर.ए) कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले उद्यम गर्न चाहनेहरु कहिल्यै निराश हुन नहुने, महत्वाकांक्षी हुनुपर्ने र अध्ययनशील हुनुपर्नेमा जोड दिँदै उहाँले उद्यम गर्न चाहनेहरुको लागि भक्तपुर नपाले युवा उद्यमशीलता ऋणको व्यवस्था गर्दै आएको बताउनुभयो ।

युवाहरुलाई लक्षित गर्दै भक्तपुर नपाले विभिन्न सीपमूलक तालिमहरु सञ्चालनमा जोड दिंदै आएको उहाँले बताउनुभयो ।

वैदेशिक रोजगारीमा सीप सिकेर जाने क्रम बढ्दै गएको बताउँदै सामान्य सीप पनि नसिकी विदेशिएका जनशक्तिहरुले विदेशमा धेरै संघर्ष र दुःख भोग्नु परेको उहाँले बताउनुभयो ।

लघु उद्यम साना, मझौता तथा ठूला उद्योगहरुको जग र प्रगतिको माध्यम भएको बताउँदै उहाँले लघु उद्यम स्थानीय आर्थिक क्रियाकलापको महत्वपूर्ण आधारशिला पनि भएको बताउनुभयो ।

भक्तपुर नगरपालिकाका उपप्रमुख रजनी जोशीले भक्तपुर नपाले समाज उत्थानका लागि शिक्षा, स्वास्थ्यलाई विशेष प्राथमिकतामा राख्दै विभिन्न गतिविधिहरु सञ्चालन गर्दै आइरहेको बताउनुभयो ।

पयटन शुल्क भक्तपुर नपाको मुख्य आयस्रोत भएको बताउँदै उहाँले पर्यटकहरुबाट उठेका पर्यटन शुल्कलाई नगरकै शिक्षा, स्वास्थ्य, विकास निर्माण जस्ता गतिविधिहरुमा उपयोग गर्दै आएको बताउनुभयो ।

भक्तपुर नपाका प्रमुख प्रशासीकय अधिकृत वसन्त भट्टराईले लघु उद्यम विकास कार्यक्रमअन्तर्गत सहभागीहरुलाई विभिन्न तालिम दिई प्राविधिक हस्तान्तरण गर्ने प्रावधान रहेको उल्लेख गर्दै नेपाल सरकराले सञ्चालन गर्ने आर्थिक विकास कार्यक्रमहरुमा जोडिन समेत सहज हुने बताउनुभयो ।

भक्तपुर नपाको लघु उद्यम विकास सहजकर्ता गीताकुमारी कोइरालले कार्यक्रमको उद्देश्य र सञ्चालनबारे प्रष्ट पार्दै आर्थिक विपन्न समुदायलाई आत्मनिर्भर बन्ने कार्यक्रममा सहभागी हुन आग्रह गर्नुभयो । कार्यक्रमका सहभागीले सामाजिक नक्सा र स्रोत नक्सा तयार गर्दै कार्यक्रमको प्रभावकारिताको पक्षमा आफ्ना योजनाहरु निर्माण गर्नुपर्ने उहाँले बताउनुभयो ।