जीवनशैली व्यवस्थापन विषयमा अभिमुखीकरण कार्यक्रम सम्पन्न

भक्तपुर नगरपालिकाका प्रमुख सुनिल प्रजापतिले खराब जीवनशैली रोगहरुको प्रमुख कारण भएको बताउँदै स्वस्थ जीवनशैलीबाट मानिसलाई धेरै रोगहरुबाट मुक्त गर्ने बताउनुभयो ।

जिल्ला आयुर्वेद स्वास्थ्य केन्द्र भक्तपुरको आयोजनामा भएको जीवनशैली व्यवस्थापन कार्यक्रममा बोल्दै उहाँले जीवन जिउने तरिकालाई व्यवस्थित गर्नेतर्फ सबैले ध्यान दिनुपर्छ भन्नुभयो ।

समयमा स्वस्थ खानेकुरा खाने, नियमित व्यायाम गर्ने, सकारात्मक सोच राख्ने लगायतका विषयमा ध्यान दिनुपर्ने बताउँदै उहाँले खानपान पनि जीवनशैलीको एक महत्वपूर्ण घटक भएको बताउनुभयो ।

विकृत जीवनशैलीका कारण संसारमा विभिन्न किसिमका रोगहरु देखा पर्न थालेको बताउँदै उहाँले विकृत जीवनशैली र मोटोपनाका कारण महिलाहरुको प्रजनन् क्षमता नकारात्मक असर पु¥याइरहेको बताउनुभयो ।

कार्यक्रममा जिल्ला आयुर्वेद स्वास्थ्य केन्द्र सञ्चालन र व्यवस्थापन समितिका राजुप्रसाद अधिकारी, जिल्ला जनस्वास्थ्य केन्द्र भक्तपुरका प्रमुख नरेन्द्रप्रसाद गिरी, वैद्य निरीक्षक श्यामकुमार रायमाझीलगायतले पनि बोल्नुभएको थियो ।