बृहत पोषण विशेष कार्यक्रम ७ दिने आधारभूत क्षमता अभिवृद्धि तालिम सम्पन्न

भक्तपुर नगरपालिकाका प्रमुख सुनिल प्रजापतिले नपाबाट सञ्चालित ख्वप अस्पतालको आयोजनामा भएको बृहत पोषणसम्बन्धी आधारभूत क्षमता अभिवृद्धि तालिमका सहभागी चिकित्सक, नर्स तथा स्वास्थ्यकर्मीहरुलाई आइतबार एक कार्यक्रमबीच प्रशंसा पत्र वितरण गर्नुभयो ।

कार्यक्रममा बोल्दै प्रमुख प्रजापतिले बालबालिकाको स्वास्थ्य, जीवनरक्षा र विकासको लागि पोषण महत्वपूर्ण भूमिका हुने बताउँदै राम्रो पोषण पाएका बालबालिकाहरुले राम्रारी हुर्कन, सिक्न र समुदायको लागि योगदान दिन सक्षम हुने बताउनुभयो ।

बालबालिकालाई कुपोषणबाट बचाउन पोषणसम्बन्धी विशेष तालिमको आवश्यकता पर्ने बताउँदै चिकित्सक र स्वास्थ्यकर्मीले तालिमबाट आफूले पाएका ज्ञान समुदायका बालबालिकालाई कुपोषणबाट जोगाउन आवश्यक भूमिका खेल्नुपर्ने उहाँले बताउनुभयो ।

सन्तुलित भोजन आजको आवश्यकता रहेको बताउँदै उहाँले आफ्नो शरीरलाई हानी पुर्याउने वस्तुको सेवनबाट टाढा रहनुपर्ने र शरीरलाई फाइदा पुग्ने अन्नको सेवनमा जोड दिई स्वस्थ जीवन बाँच्न सबैलाई प्रेरित गर्नुभयो ।

उहाँले भक्तपुर नपाले नागरिकहरुको सहज स्वास्थ्य उपचारको लागि ख्वप अस्पताल सञ्चालन गरेको बताउनुहुँदै अस्पतालमा कार्यरत सबैले बिरामीहरुको सेवा गर्ने भावनाले काम गर्नुपर्नेमा जोड दिनुभयो ।

कार्यक्रममा ख्वप अस्पतलका निमित्त मेडिकल डाइरेक्टर डा. मजेशप्रताप मल्लले बालबालिकाहरुको पोषणमा गरिने लगानीले उनीहरुलाई दीर्घकालीन प्रतिफल प्राप्त हुने बताउँदै पोषणको महत्वबारे जनचेतना जगाउनु आवश्यक भएको बताउनुभयो ।

कार्यक्रममा तालिमका प्रशिक्षक गंगाप्रसाद पौडेल, डा. विजय ज्याख्व, नर्स रबिना कवांले तालिमबारे आफ्नो अनुभव सुनाउनुभयो । साथै ख्वप बुहप्राविधिक अध्ययन संस्थानका प्राचार्य डा. रत्नसुन्दर लासिवाले तालिमको उद्देश्य र महत्वमाथि प्रकाश पार्नुभयो ।